Mohit Trendy Baba's few lucky saved works from defunct websites, forums, blogs or sites requiring visitor registration....

Thursday, January 22, 2015

Case Study MacD

A toon by me and Dheeraj 'Dkboss' Kumar

Ek case hua recently Pune ke MacDonalds mey jahan ek gareeb bachche ko ek mahila daya kar ke restaurant ke andar le aayi par restaurant ke karmchariyon ne us bachche ko baahar kar diya. Ye baat social media aur phir news mey aayi, halla hua...aur Macdonalds ne apni Pune branch anishchitkaal ke liye band kar di saath hi doshi karmchaariyon ko nikal diya. Hai to image bachane ke liye dikhawa bhar bas aur waise to videshi loot ke centers hai ye wo bhi average khaana parosne waale par kuch mitron se discussion mey kuch counter points aaye unpar aapki honest rai jaanna chahunga.

*) - Daya kar ke hum kabhi kabar gareebo ko khana ya paisa dete hai, par unhe ghar ke andar nahi laate....agar wahi kaam Macdonalds ki us branch ne karna chaha to kaise galat hua?
*) - Maan lijiye aap apni Girl Friend ya wife ya parivaar ke saath kisi special occasion par kisi restaurat aaye hai to aap kis jagah jaayenge.....jahan seats par aapke jaisa crowd hoga ya mixed crowd hoga jinme slums ke log bhi honge. 9 out of 10 times log normal crowd ko prefer karegi to apna business bachchane ke liye agar koi aesa bartaav kare aur unhe baahar rakhe to phir halla kyu? Jo baat middle class janta ko kehte sharm aa rahi hai wo is jagah ke employees ne kar di to kya hua?
*) - Restaurants ke baahar badi sankhya mein gareeb bachche, log baithte hai jinhe agar koi khilana chahe to andar se khareed kar baahar burger, ice cream etc de sakta hai jo log karte bhi hai.
*) - 10-15 hazaar kamane waale karmchariyon ki gardan pakadne se kya faayda? Wo khud koi ameer nahi hai....

Apna paksh bhi bata dun, mai aese sansthano ka virodh karta hun jo ek system bana kar dheere-dheere desi sampatti kheenchte hai aur paisa bachane ke liye brand ki aad mein aksar below par khadya saamagri paros dete hai (Udahran ke liye last year U.P. mein hue inspections mein Fungus lage burgers, expired maal mila kuch branches se). Par upar likhi baaton se ye bhi maanta hun ki humey aatm manthan ki zaroorat hai khaaskar desh ke middle class waale bade bracket ko...

No comments:

Post a Comment